Suprastanza

Victoria Mosca - Co-presidenta: Eau sun creschida sü a Samedan inua ch'eau d'he giodieu mieu temp liber cun fer differents sports ed esser activa tals battasendas. Ils prüms pass da lavur sun stos scu magistra primara in Engiadina ed ün pêr ans pü tard eir a Turich. Illa Bassa d'heja pudieu fer ün seguond stüdi a l'universited da Turich. Il stüdi dad istorgia e lingua e cultura rumauntscha ho sdasdo la vöglia da s'ingascher dapü per la lingua materna. Uschè suni turneda darcho in val, inua ch'eau lavur scu magistra primara e magistra da rumauntsch al gimnasi.

Gianna Duschletta - Co-presidenta: Eau sun studenta a la scoul'ota da pedagogia a Berna ed uriundamaing da S-chanf. Mieu böt es quel da dvanter magistra pel s-chelin ot e da pudair instruir rumauntsch a la prosma generaziun. Illa suprastanza da l’UdG d’he eau surpiglio las lezchas da chürer la pagina d'internet, l’organisaziun dal Poetry Slam Engiadinais, la communicaziun culs commembers e cun que eir ils newsletters.

Jon Duri Pult - Chaschier: Eu sun uriund da Ftan e stun cun mia famiglia a Samedan. Davo il giarsunadi da comerzi a Zuoz suna stat tschinch ons a Turich per lavur e scolaziun. Daspö il 2016 suna darcheu in patria e lavur sco fiduziari a San Murezzan. Eu m’allegr da m’ingaschar illa suprastanza da l’UdG per nossa lingua.

Fadrina Hofmann - Assessura: Eu n'ha stübgià scienzas da media e communicaziun, schurnalissem e rumantsch a l’università da Friburg. Lura n'haja lavurà per diversas gazettas, tanter oter pella «Südostschweiz». Actualmaing suna redactura pella Engadiner Post/Posta Ladina. Eu n'ha publichà plüs cudeschs e scriv regularmaing texts per differentas publicaziuns. Pro l’Uniun dals Grischs sun eu respunsabla pella «Chasa Paterna» e pella communicaziun. Eu viv cun mia famiglia a Scuol.

Carmen Baumann - Actuara: Zieva mi’infanzia e giuventüna a Champfèr, d’heja absolt il stüdi da litteratura e linguistica rumauntscha ed inglaisa a l’universited da Turich. Zieva’l stüdi d’heja lavuro ses ans per la "Südostschweiz" a Cuira, il prüm scu redactura tal radio e zieva scu moderatura e redactura tar la televisiun. Daspö lügl passo suni darcho inavous in Engiadina e lavur tar San Murezzan Turissem scu Head of Marketing Services.